Kurti: Marrëveshja Serbi-Rusi duhet t’i alarmojë kryeqendrat perëndimore

Kryeministri i Kosovës, Albin Kurti është shprehur se marrëveshja e bashkëpunimit e nënshkruar nga ministri i jashtëm serb Nikola Selakoviç dhe ai rus Sergei Lavrov duhet t’i alarmojë kryeqendrat perëndimore demokratike.

Kurti, duke iu përgjigjur deklaratës se presidentit serb Aleksandar Vuçiç i cili tha se ka informacione që kryeministri i Kosovës ka qenë në kërkim të artilerisë me rreze veprimi më shumë se 10 kilometra, u shpreh se ky i fundit është një president i frikës dhe i kërcënimit.

“Me çështjet e mbrojtjes dhe sigurisë në Kosovë, ne kemi ministër të Mbrojtjes, kemi ministër të Punëve të Brendshme, por ne jemi qeveri demokratike, progresiste, e shpresës. Ndërkohë që përballemi me fqinjin tonë verior, që udhëhiqet nga një president i frikës dhe i kërcënimit, që përveç se udhëheq me një shtet në mënyrë jo demokratike dhe nuk e njeh Kosovën dhe krimet të cilat i ka kryer regjimi i Millosheviqit në Kosovë, gjithashtu mban edhe lidhje shumë të ngushta me Federatën Ruse, siç e pamë edhe së fundi me marrëveshjen e bashkëpunimit që nënshkroi ministri i jashtëm serb me atë rus që duhet t’i alarmojë kryeqendrat perëndimore-demokratike”, -tha Kurti  në një deklaratë për mediat e Kosovës.

Ministri i Punëve të Jashtme të Serbisë Nikola Selakoviç dhe ai i Rusisë Sergei Lavrov kanë nënshkruar një marrëveshje për të koordinuar politikën e jashtme.

LEXONI GJITHASHTU: 

• Albin Kurti tregon pse lejoi vizitën e kryeministres serbe në Kosovë
• Dialogu Kosovë-Serbi, çfarë prodhuan dy takimet e Albin Kurtit me Aleksandër Vuçiç?