Kurti mohon të ketë informacione rreth një ndërhyrje të mundshme të KFOR-it në veri

Kryeministri i Kosovës, Albin Kurti, mohoi sot të kishte informacione rreth një angazhimi të mundshëm të KFOR-it për situatën në veri.

Në konferencën për shtyp me homologun e tij të Shqipërisë, Edi Rama, Kurti tha se të gjitha vendimet e marra nuk kanë qenë politike, por “profesionale për sigurinë”. Ai theksoi se në çdo hap ka pasur koordinim dhe shkëmbime informacioni me KFOR-in.

“Nuk kam ndonjë informacion të tillë për ndonjë përgatitje të ndërhyrjes së KFOR-it,” – tha Kurti duke iu përgjigjur interesit të gazetarëve.

“Ne diskutuam me gjeneralin [Franco] Federici, komandantin e përgjithshëm të KFOR-it për situatën e sigurisë meqenëse i kemi policët tanë atje dhe ata e bëjnë vlerësimin e situatës. Pra vendimet që ne i marrim nuk janë të pastra politike, madje përmbajtja e tyre është shumë profesionale e sigurisë,” – shpjegoi Kurti.

Kryeministri i Kosovës tha se komandanti Federici po mban kontakt me kryetarët e komunave serbe në Veri në kuadër të interesimit për të qetësuar situatën.

Kurti tregoi se të dielën ka pasur diskutime me Sekretarin e Përgjithshëm të NATO-s, Jens Stoltenberg dhe Përfaqësuesin për Politikë të Jashtme të BE Josep Borrell. Ai tha se është i hapur për bisedime dhe kujtoi se me këtë qasje ka qenë që më 20 shtator.