Kush është gruaja e parë presidente në historinë e Meksikës

Shkencëtarja e klimës Klaudia Sheinbaum do të jetë presidentja e parë femër në historinë e Meksikës, pasi fitoi me rreth 60 për qind të votave në zgjedhjet presidenciale të së dielës.

“Do të jem gruaja e parë presidente e Meksikës. Nuk arrita e vetme deri këtu, ia arritëm të gjithë së bashku”, u shpreh Sheinbaum përpara simpatizantëve.

Kandidatja e partisë në pushtet bëri fushatë me premtimin për të vazhduar kursin politik të caktuar në 6 vitet e fundit nga presidenti në ikje dhe mentori i saj politik, Andrés Manuel López Obrador.

Dita e zgjedhjeve në Meksikë u shënua nga akte dhune pasi një kandidat për këshillin bashkiak të qytetit Kuitezo u qëllua për vdekje nga dy vrasës me motor.

Banorët votuan nën një prani policie të theksuar dhe më vonë kaluan pranë kandidatit të vrarë, Israel Delgado, për të ndezur qirinj në nder të tij.

Rreth 100 milionë persona ishin të regjistruar për të votuar, por pjesëmarrja ishte paksa më e ulët se në zgjedhjet e kaluara.

Gjatë fushatës Sheinbaum u fokusua më shumë tek çështjet sociale, duke premtuar programe financiare për rritjen e pensioneve për të moshuarit dhe për të nxitur të rinjtë drejt tregut të punës.

Por zgjedhjet u konsideruan edhe si një referendum për tashmë ish-presidentin Obrador, i cili dështoi të reduktonte dhunën e karteleve të drogës në Meksikë.

Sidoqoftë, partia e tij Morena aktualisht kontrollon 23 nga 32 postet e guvernatorëve të vendit dhe një shumicë të lehtë vendesh në dhomën e Kongresit.

LEXONI GJITHASHTU:

• Zgjedhjet në Meksikë, 1 i vrarë gjatë votimit, 38 politikanë të vrarë gjatë fushatës
• 2 gra kundër karteleve, e para herë në Meksikë, 2 kandidate për presidente