Kush është Lanika Rexhepi? Kosovarja që shkroi histori për Shqipërinë në Evropianin e Karatesë

Pak ditë pas përfundimit të Kampionatit Evropian të Karatesë, emri i Lanika Rexhepit vazhdon të përmendet me krenari në mbarë hapësirën shqiptare. Karateistja kadete nga Prishtina u shpall nënkampione e Evropës në kategorinë Cadet Female Kumite +61 kg, duke fituar medaljen e argjendtë dhe duke hyrë në histori si vajza e parë që siguron një medalje evropiane për Federatën Shqiptare të Karatesë.

Por kush është Lanika Rexhepi? E rritur në Kosovë dhe e formuar si sportiste me disiplinë të lartë e përkushtim maksimal, ajo përfaqësoi Shqipërinë në arenën evropiane me pjekuri që tejkalon moshën e saj. Rrugëtimi i saj drejt finales ishte mbresëlënës: ajo dominoi Malin e Zi me rezultat 8–0, mposhti Gjeorgjinë po ashtu 8–0, kaloi Francën 6–1 dhe Italinë 3–0, duke siguruar finalen e madhe pas katër fitoreve bindëse. Në duel për medaljen e artë, ajo u ndal nga Portugalia me rezultat minimal 0–1, duke e mbyllur garën me medaljen e argjendtë.

Suksesi i saj nuk është vetëm personal. Ai përfaqëson një moment historik për sportin shqiptar, pasi kjo është medalja e parë evropiane për vajzat në historinë e këtij federate. Lanika Rexhepi, edhe pse nga Kosova, mbrojti me dinjitet flamurin kuqezi, duke dëshmuar se talenti dhe përkushtimi shqiptar nuk njohin kufij.