La Liga, ndaj Valladolid Barcelonës i mjafton Dembele, tashmë Atletico vetëm një pikë larg

Një gol i minutave të fundit nga Ousmane Dembele i dha Barcelonës fitoren minimale 1-0 ndaj Real Valladolid të hënën, rezultat që i ngjiti katalanët në vendin e dytë të kampionatit spanjoll të futbollit.

Në një ndeshje që u vështirësua shumë nga fakti se Valladolid u mbyll krejt prapa, Barcelona vuajti për të konkretizuar aksionet e saj.

Skuadra e Ronald Koeman krijoi më shumë se 25 aksione dhe 10 goditje drejt portës kundërshtare, mirëpo u desh të vinte minuta e 90-të që një lojtar i saj të gëzonte një gol.

Dembele realizoi golin e tretë në 5 ndeshjet e fundit, i dyti në radhë që vjen në fund të një ndeshjeje pas atij të realizuar në minutën e 89-të ndaj Kazakistanit me Francën.

Barcelona përfiton kështu nga ndalesa e Atletico Madrid, që në fundjavë u mund 1-0 nga Sevilla dhe shkurton distancën me ta në vetëm 1 pikë.

Pas këtij rezultati vëmendja shkon te klasikja me Realin, në plan për t’u luajtur të shtunën.