La Liga, Valencia “detyrohet të luajë” pavarësisht pretendimeve për fyerje raciste

Mbrëmjen e së dielës ekipi i Valencias ndali përkohësisht ndeshjen kundër Cadiz-it dhe u largua nga fusha pasi një futbollist i saj tha se pësoi fyerje raciste nga një kundërshtar.

Klubi tha në një deklaratë për shtyp se u detyrua të vijojë ndeshjen pas kërcënimit nga gjyqtari me humbje në tavolinë nëse nuk do të ktheheshin në fushë.

Të ashtuquajturit “Los Murcielagos” protestuan pasi Mouctar Diakhaby tha se u fye nga mbrojtësi i Cadizit Juan Cala. Ky i fundit mohoi gjithçka. Rasti ndodhi rreth minutës së 30-të. Diakhaby refuzoi të luajë më dhe u zëvendësua nga Guillamon.

Skuadra iu rikthye fushës 20 minuta më vonë dhe e humbi ndeshjen 2-1.

“Gjyqtari u tha lojtarëve se do të kishin pasoja nëse nuk i kthehshin fushës,” – tha klubi i Valencias në një deklaratë për shtyp, – “Lojtarët u detyruan të luanin pas kërcënimit për ndëshkime.”

Kapiteni i Valencias Jose Luis Gaya tha se Diakhaby ishte i rënduar emocionalisht dhe nuk ishte në kushtet për të luajtur. Trajneri i Cadiz-it, Alvaro Cervera tha se lojtari i tij, Cala “nuk fyeu askënd” dhe se ai i besonte lojtarit të tij.

Mbrojtësi tjetër i Cadiz-it, Marcos Mauro iu shmang komenteve rreth këtij incidenti, por tha se Cala “është një shok i mirë skuadre” dhe “gjithmonë është i respektueshëm”.

Nëse Valencia përpilon ankesë zyrtare për çështjen, Federata Spanjolle e Futbollit do të duhet të marrë në konsideratë ndëshkime serioze. Zyrtarisht klubi ka deklaruar se shpreson që “çështja të hetohet plotësisht”.

Pas 29 javësh kampionat, Valencia dhe Cadiz i qëndrojnë mesit të tabelës së renditjes në vendin e 12-të dhe 13-të, ndërsa kryesimin e mban Atletico Madrid.