Durrësi lëkundet nga tërmeti, epiqendra pranë detit Adriatik

Një tërmet me magnitude 4.1 të shkallës Rihter ka goditur këtë mëngjes vendin tonë. Lëkundjet janë ndierë rreth orës 8:19 me orën lokale.

Sipas të dhënave që bën të ditur Instituti i Gjeoshkencave, Energjisë, Ujit dhe Mjedisit tërmeti ka pasur një fuqi prej 4.1 magnitudë me epiqendër 2 km në veri të qytetit të Durrësit, pranë Ishmit dhe thellësia e goditjes ka qenë 2 km.

Nga Ministria e Mbrojtjes nuk raportohet për dëme në ndërtesa apo dëme të tjera materiale. Lëkundjet janë ndjerë edhe në zonën e Thumanës, por edhe në Lacc dhe Lezhë. 

Ndërkohë, Qendra gjermane për Kërkimet e Gjeoshkencës raporton se bëhet fjalë për një mangiturë 5.0 dhe se goditja ka pasur një thellësi prej 10 km. 

Sipas tyre, tërmeti i orës 08:19 ka pasur si epiqendër detin Adriatik, rreth 21 km në veri të Durrësit dhe 17 km në jugperëndim të Laçit.

Fuqia e tërmetit pritet të rishikohet në orët e ardhshme pasi sizmologët janë duke bërë përllogaritjet e tyre.

Nga të dhënat e para, shumë persona kanë ndjerë lëkundjet por nuk ka raportime për dëmtime në njerëz dhe materiale.

Në fund të vitit të kaluar (26 nëntor 2019) Durrësi por dhe zona përreth u goditën nga një tërmet shkatërrues duke shkaktuar 51 viktima kryesisht në qytetin bregdetar dhe Thumanë.