Lezhë | Operacioni “Fishat”, goditet kazino e paligjshme në qendër të qytetit

Policia e Shtetit ka finalizuar operacionin policor të koduar “Fishat”, të zhvilluar nga Sektori për Hetimin e Krimit Ekonomik dhe Financiar në Departamentin e Policisë Kriminale, në bashkëpunim me Drejtorinë e Forcës së Posaçme Operacionale.

Gjatë operacionit u evidentua përshtatja e një godine trekatëshe për ushtrimin e lojërave të fatit të paligjshme dhe përdorim të lëndëve narkotike, në bulevardin “Gjergj Fishta”, në Lezhë.

Nga kontrolli, Policia sekuestroi 15 makineta lojërash fati, tavolinë pokeri, çipsa dhe letra bixhozi, disa doza kokaine, si dhe shuma të konsiderueshme parash në lekë, euro dhe dollarë, rreth 725 mijë lekë të rinj.

Në pranga u vu B. A., 47 vjeç, i dyshuar si përgjegjësi i kazinosë, ndërsa u shpall në kërkim E. U., 24 vjeç, organizatori i aktivitetit, i cili kishte marrë me qira objektin dhe e kishte përshtatur për kazino. Vijon puna për kapjen e tij.

Gjithashtu, u proceduan penalisht 15 shtetas, të kapur në flagrancë duke luajtur lojëra fati në ambientet e kazinosë.

Ndërkohë, Drejtoria e Standardeve Profesionale në Policinë e Shtetit ka nisur hetim disiplinor për disa drejtues dhe punonjës policie, të dyshuar për mosveprim në parandalimin e kësaj paligjshmërie.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, ndërsa hetimet vijojnë për dokumentimin e plotë të rastit.