Liga e Kampionëve rikthehet me superduelin Barça-Bajern

Gjithë sytë do jenë në “Camp Nou” të martën në mbrëmje pasi Barcelona dhe Bayern Munchen sfidojnë njëra-tjetrën për herë të parë pas atij rezultati historik me shifrat 8-2.

Bajerni i Mynihut e nis këtë edicion të Ligës së Kampionëve teksa këtë të martë do të përballet me ekipin e Barcelonës në Kamp Nou në ndeshjen e vlefshme për Grupin E. Pas fitores  8-2, 13 muaj më pare, ku bavarezët i shkaktuan humbjen më të thellë në historinë e kupave të Europës katalanasve, trajneri i gjermanëve, Julian Nagelsman nuk e pranon etiketimin e favoritit në përballjen e së martës.

“Favoritë apo jo: Kjo është një çështje më shumë mediatike. Unë mendoj se të luajmë mirë është më e rëndësishmja dhe te vëmë në zbatim ato që kemi praktikuar në stërvitje dhe jo të flasim se kush është apo kush nuk është favorit. Mendoj se kemi përballë dy ekipe të klasit botëror dhe ajo që është e rëndësishme oshtë gjendja fizike e çdo lojtari dhe motivimi i tyre në ditën e ndeshjes”, tha trajneri Julian Nagelsmann.

Bajerni e ka nisur mjaft mirë sezonin e ri dhe Lojtari i vitit i FIFA-s, Robert Levandovski është në formë mjaft të mirë teksa ka arritur të shënojë në 17 ndeshjet e fundit zyrtare për bavarezët, teksa në kampionat ka shënuar 6 gola në katër takimet e fundit.

Me Lionel Messi që u largua drejt PSG-së, kjo do të jetë hera e pare që nga nëntori i vitit 1998 që Bayerni do të përballet me Barcelonën pa sulmuesin argjentinas.