Janë rreth 80 rastet e konfirmuara me linë e majmunit nëpër botë dhe mbi 50 raste të tjera të dyshuara.

Të dhënat janë bërë të ditura nga Organizata Botërore e Shëndetësisë, pasi Franca, Gjermania, Belgjika dhe Australia raportuan rastet e para.

“Virusi i lisë së majmunit mendohet se ka një kalim të kufizuar mes njerëzve. Por gjasat që ai të përhapet nga kontakti i afërt, si për shembull aktiviteti seksual, vlerësohet të jenë të larta”, thotë Christian De Keersmaecker, zëdhënës i Komisionit Evropian.

Njerëzve të ekspozuar ndaj virusit u jepet shpesh herë një nga vaksinat e shumta kundër lisë, të cilat kanë rezultuar efikase. Ilaçet anti-virale janë gjithashtu në zhvillim. Kompania “SIGA Technologies” po prodhon një prej tyre.

“Ky është një ilaç që është prodhuar me sponsorizimin e qeverisë amerikane, për të qenë në stok për përdorim kundër lisë së zakonshme, në rast se ajo përdoret si një armë. Ilaçi i veçantë megjithatë funksionon kundër të gjitha familjeve të viruseve: lisë së zakonshme, asaj të dhenve dhe tani asaj të majmunit. Ai është aprovuar për mjekim në Shtetet e Bashkuara nën emrin TPOXX dhe së fundmi nga EMA për trajtimin e viruseve të këtij lloji, që përfshin edhe atë të majmunit. Jam optimist se do të jetë një medikament shumë efikas”, shprehet Dennis Hruby, nga SIGA Technologies.

Lija e majmunit është një sëmundje e përhapur në zonat e largëta të Afrikës Qendrore dhe asaj Perëndimore.

Bëhet fjalë për një infeksion viral që zakonisht është i butë dhe nga i cili njerëzit mund të rikuperohen brenda pak javësh.

Virusi nuk përhapet lehtësisht mes njerëzve dhe rreziku që të zgjerohet mbetet i vogël.

LEXONI GJITHASHTU:

• Belgjika do të vendosë në karantinë të infektuarit me linë e majmunëve
• 2 raste me linë e majmunëve në Mbretërinë e Bashkuar, çfarë dihet për virusin