Lirohen me kusht edhe Bashkim Smakaj dhe Fadil Fazliu

Dhomat e Specializuara në Hagë kanë vendosur lirimin me kusht edhe të Bashkim Smakajt dhe Fadil Fazliut. Sipas njoftimit zyrtar më 10 shkurt, Smakaj dhe Fazliu u liruan me kusht dhe u kthyen në Kosovë.

Në vendimet e marra më 3 shkurt 2026, gjykatësi konstatoi se rrethanat kishin ndryshuar që nga rishikimi i fundit i paraburgimit në dhjetor 2025 dhe se vazhdimi i mbajtjes së tyre në paraburgim nuk ishte më i arsyeshëm dhe proporcional.

Edhe pse u vlerësua se ende ekziston një rrezik i kufizuar për pengim të procesit gjyqësor, gjykatësi arriti në përfundimin se e drejta themelore për liri peshon më shumë se këto rreziqe.

Gjykata theksoi se faza e paraqitjes së provave në procesin gjyqësor ndaj ish-krerëve të UÇK-së tashmë ka përfunduar, duke vlerësuar se çdo tentativë për pengim të procesit do të ishte e zbulueshme.

Gjykatësi konstatoi gjithashtu se nuk ekziston rrezik arratisjeje. Smakaj dhe Fazliu mbeten të akuzuar në gjykimin aktual dhe lirimi i tyre me kusht shoqërohet me një sërë masash dhe kufizimesh. Të martën, me kusht është liruar edhe ish-komandanti i UÇK-së, Haxhi Shala.

Vendimi është marrë nga gjykatësi i vetëm në kuadër të çështjes së Prokurorit të Specializuar kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit.