Lirohen pengjet e mbajtura në një bankë në Gjermani, arratisen autorët

Dy pengjet e mbajtura në një bankë në Sinzig në Gjermani janë liruar. Autorët e krimit janë arratisur. Policia njoftoi se gjeti në kasafortë dy persona që ishin mbajtur peng që nga mëngjesi, por jo autorët, të cilët ishin arratisur.

Pengjet janë shëndoshë e mirë, ndërsa një operacion kërkimi për autorët është duke u zhvilluar në zonë.

Sipas autoriteteve, deklaratat e pengjeve pritet të hedhin dritë mbi rastin. Ekspertët janë gjithashtu në vendngjarje për të mbledhur prova që do të ndihmojnë në sqarimin e rastit.

Situata e pengjeve filloi të premten në mëngjes kur një automjet për transport parash ndaloi jashtë bankës dhe shoferi doli për të folur me punonjësit kur u sulmua nga një burrë i panjohur. Besohet se një nga pengjet ishte shoferi i automjetit, ndërsa policia nuk ka dhënë asnjë informacion në lidhje me autorët.

Qindra oficerë policie morën pjesë në operacion, ndërsa forcat speciale nxituan edhe nga shtetet fqinje të Baden-Württemberg dhe North Rhine-Westphalia.