Lirohet balerina e arrestuar për tradhti, shkëmbim të dënuarish mes SHBA dhe Rusisë

Shtetet e Bashkuara dhe Rusia kanë realizuar një tjetër shkëmbim të dënuarish, në atë që konsiderohet si një përpjekje për ripërtëritjen e marrëdhënieve mes dy vendeve.

Një grua me nënshtetësi të dyfishtë amerikano-ruse, e burgosur në Rusi për tradhti, u lirua të enjten në kuadër të këtij shkëmbimi të dënuarish mes Rusisë dhe Shteteve të Bashkuara.

Ajo u shkëmbye me Arthur Petrov, një shtetas gjermano-rus i arrestuar në Qipro në vitin 2023, nën dyshimin e trafikimit të mikroqarqeve.

Lajmin e bëri të ditur sekretari i Shtetit, Marco Rubio, sipas të cilit Ksenia Karelina ka lënë Rusinë për t’u kthyer në Amerikë.

Karelina u arrestua në Jekaterinburg në shkurt të vitit 2024 dhe ishte dënuar për një donacion prej 47 paundësh britanikë për një shoqatë bamirësie ukrainase.

Shtetet e Bashkuara e cilësuan dënimin e saj si “tërësisht qesharak.”

Ksenia Karelina, ish-balerinë, mori nënshtetësi amerikane pasi u martua me një amerikan dhe u transferua në Los Anxhelos. Ajo u arrestua vitin e kaluar kur u kthye në Rusi për të vizituar familjen.

Shërbimi Federal i Sigurisë në Moskë deklaroi se, në mënyrë aktive, Karelina kishte mbledhur të ardhura në interes të një shoqate ukrainase, e cila më pas blinte furnizime mjekësore, armatime dhe municione për forcat e armatosura ukrainase.

Vetë ajo, sipas mediave ruse, u vetëdeklarua fajtore gjatë procesit të zhvilluar me dyer të mbyllura.

Ky shkëmbim vjen në një kohë kur si Shtetet e Bashkuara ashtu edhe Rusia po përpiqen të riparojnë marrëdhëniet mes tyre.

LEXONI GJITHASHTU:

• Kina mohon pretendimet e Zelensky se shtetas kinezë luftojnë përkrah Rusisë 
• Pas pezullimit të tarifave nga Trump, edhe BE heq kundërmasat ndaj SHBA