Lironte të dënuar përmes ryshfetit, ish-gjyqtarja e Krujës pranon gjykim të shkurtuar

Gjykata e Posaçme e Shkallës së Parë për Korrupsionin dhe Krimin e Organizuar do të japë më 25 tetor vendimin për ish-gjyqtaren e Krujës, Enkelejda Hoxha pas pranimit të gjykimit të shkurtuar.

Hoxha u arrestua më 11 shkurt 2021 për korrupsion me dyshimin se ka liruar nga burgu persona të dënuar me burgim të përjetshëm apo me dënime të rënda.

Bashkë me gjyqtaren u arrestua dhe avokati Aldo Tabaku si dhe sekretarja e gjykatës, Emanuela Mallkuçi.

Në bazë të hetimeve të SPAK, të dënuarit përfitonin ulje të dënimit përmes ryshfetit që në disa raste shkonte deri në 12 mijë euro.

Ndalimi i gjyqtares erdhi pas vendimit për të liruar me kusht Endrit Doklen, një nga personat më të përfolur për Bandën e Durrësit.

Gjithashtu më parë gjyqtarja kishte dhënë vendim të njëjtë për Genc Tafilin dhe Hekuran Billën ndërsa kishte në shqyrtim kërkesën e Saimir Petanit.

Nga përgjimet për këtë çështje ra në pranga dhe mjeku kardiolog, Edvin Prifti, i cili kishte pranuar para nga Mallkuçi për të kryer ndërhyrje kirurgjikale për nënën e saj.