Dita e 5-të e protestës, policia shpërndan me gaz lotsjellës të rinjtë

20:25 Forca të shumta policie kanë ndjekur deri në zonën e Laprakës disa nga protestuesit duke bërë dhe shoqërimin e disa prej tyre. Zona e Laprakës është pikërisht vendi ku u vra Klodian Rasha.

20:15 Forcat e policisë kanë ndjekur deri pranë zonës së Zogut të Zi protestuesit e fundit në përpjekje për t’i dhënë fund ditës së pestë të protestës.

20:05 Një grup i vogël protestuesish që ndodhej në sheshin “Skënderbej” është detyruar të shpërndahen nga përdorim i gazit lotsjellës nga forcat e policisë.

20:00 Pas përdorimit të gazit lotsjellës dhe makinës me ujë për shpërndarjen e protestuesve një pjesë e protestuesve janë shpërndarë duke shënuar kështu dhe mbylljen e ditës së pesë të protestës për vrasjen e 25-vjeçarit Klodian Rasha.

19:20 Forcat e policisë nuk lejojnë afrimin e protestuesve në Drejtorinë e Policisë së Tiranës. Policia po përdor gaz lotsjellës për të shpërndarë protestuesit.

19:15 Gjatë marshimit bie në sy solidariteti i përdoruesve të automjeteve me protestuesit.

19:10 Protestuesit nisen drejt Drejtorisë së Policisë së Tiranës. Ndryshe nga ditët e mëparshme policia nuk po ndërhyn për t’i penguar, nuk ka as përdorim të gazit lotsjellës apo makinës për hedhje uji.

18:45 Protestuesit kanë nisur marshimin nga sheshin “Skënderbej” drejt Kryeministrisë. Thirrjet e tyre janë kundër qeverisë ndërsa deri tani nuk kanë kryer asnjë akt të dhunshëm.

18:30 Situata deri tani paraqitet e qetë ndërkohë që vihet re sërish prania e të miturave në protestë.

18:26 Një tjetër protestues tha se kërkesa për largimin e Drejtorit të Policisë së Shtetit, Ardi Veliu ka ardhur për shkak se policia është përpjekur që të fshehë dhe manipulojë ngjarjen e vrasjes së Klodian Rashës.

18:25 Një prej pjesëmarrësve të protestës Genc Sejko thotë se policia po përpiqet të mos i lejojë të grumbullohen në qendër të Tiranës. “Ardi Veliu të largohet dhe të nisë një reformë e thellë në Policinë e Shtetit”, deklaroi Sejko.

18:20 Nis grumbullimi i të rinjve ndërkohë policia përpiqet që t’i largoje nga sheshi “Skënderbej”.

Pritet të vijojë në ditën e saj të 5-të protesta në Tiranë, si reagim ndaj vrasjes së 25-vjeçarit Rasha gjate një ndjekje policore.

Thirrja e bërë në rrjetet sociale për grumbullim në orën 18:00 në sheshin “Skënderbej” dhe në të gjitha sheshet e tjera të Shqipërisë, ka qarkulluar online që në mëngjes. Ndërkohë, në rrugët kryesore të kryeqytetit janë parë të stacionuara forca të shumta policore.

Për mbarëvajtjen e protestës janë angazhuar mbi 1 mijë efektivë policie përfshirë dhe Forcat e Ndërhyrjes së Shpejtë, por në gatishmëri janë dhe Forcat Speciale.

Gazetari Eni Ferhati që po raporton nga Ministria e Brendshme bën me dije se deri në orën 18:00 vihet re një prani shumë e vogël e protestuesve.

Lexoni gjithashtu:

Sociologu Tushi: Pjesëmarrja e fëmijëve në protesta do mbetet një turp i madh social

Protesta për vrasjen e Klodian Rashës, lirohen 9 demonstrues, tre mbeten në burg

Protestat për vrasjen e Klodian Rashës, Avokatja e Popullit: Qytetarët janë të zhgënjyer