Protesta e opozitës, Berisha mesazh Ramës: Nuk ikën me votë, do të heqim ne

Ka nisur rreth 20 minuta më vonë se orari i lajmëruar protesta e Partisë Demokratike para Kryeministrisë.

Kryedemokrati Sali Berisha i është bashkuar mbështetësve të mbledhur në bulevard duke ecur në këmbë nga selia e PD, i shoqëruar nga nënkryetarët Flamur Noka dhe Oerd Bylykbashi.

Ai është pritur me ovacione dhe thirrje “O Sali o hero, gjithë Shqipëria ty të do”, nga simpatizantët.

1400 forca policie janë angazhuar në terren për mbarëvajtjen e protestën së opozitës, për të cilën është lajmëruar vetëm orari i nisjes, ora 18:00 ndërsa nuk dihet sa do të zgjasë.

Policia ka njoftuar se për shkak të protestës e cila nis në orën 18:00 do të ketë kufizime në disa rrugë.

Berisha: Jemi më të vendosur se kurrë në ekzistencën tonë për të përmbysur këtë narkodiktaturë

Të dashur miq, pasi shndërroi zgjedhjet në farsë elektorale, duke organizuar me paratë tuaja mijëra veprimtari të paligjshme në periudhë elektorale, duke arrestuar liderët kryesorë të partive opozitare, duke përdorur tonelatat e drogës të karteleve, duke shndërruar nëpunësit e shtetit në policë të votës së lirë, duke falur 2 miliardë euro gjoba dhe kamata vetëm për karrigen e tij, ai në një revansh të paparë bëri gjithçka që të mbyllë çdo hapësirë opozitës.

Ai mendoi se projektin e tij Shqipëria pa opozitë, tani do e realizojë.

Miq, rrallë ndonjëherë ka vendosur, vetëm në disa vende të Afrikës, që qeveritarët të bëhen multi-miliarderë dhe miliarderë dhe qytetarët të varfërohen dhe të braktisin vendin e tyre.

Me paratë tuaja, Edi Rama ka vendosur vellon e zezë të censurës, paguan mediat e tij, të cilat glorifikojnë të keqen, i thurin lavdi krimit të tij, demonizojnë opozitën, mashtrojnë qytetarët.

Me paratë që u grabit ju, ky armik i egër i qenies shqiptare, kontrakton lobistë, ish-ministra, ish-kryeministra, diplomatë, ambasadorë, zyrtarë të lartë, për deklarata të paguara, për mashtrime ndërkombëtare, për beteja kundër opozitës.

Të gjitha duke besuar se Shqipëria pa opozitë është projekt që do e realizojë së shpejti.

Po ja ku jemi sot, më të fuqishëm se kurrë, më të vendosur se kurrë në ekzistencën tonë për të përmbysur këtë narkodiktaturë siç përmbytëm etërit e tij 35 vjet më parë.

Berisha: Kombi në momente kritike, Rama një kapobandë

Duke folur nga podiumi para Kryeministrisë, kreu i PD, Sali Berisha, tha se kombi është në një nga momentet më kritike, jo vetëm në 35 vitet e fundit, por gjatë gjithë historisë së tij mijëvjeçare.

“Në këto dhjetë vite, shqiptarët janë pakësuar më shumë se çdo epidemi, më shumë se çdo pushtet, më shumë se çdo zi buke dhe çdo gjë tjetër. Shqiptarët në këto dhjetë vite të këtij regjimi kanë shkuar mbrapa 100 vite. Sot ata kanë humbur mbi gjysmën e rinisë së vet, kanë humbur të ardhmen, dhe çdo vit bëhen gjithnjë e më pak në këtë vend të bekuar. Ndodhemi në një moment kritik, ndoshta si kurrë më parë, sepse Edi Rama, pasi shndërroi zgjedhjet në farsë elektorale, del se ka vendosur të bëhet multimilardier me paratë dhe pasuritë tuaja publike. Ai ka vendosur veten mbi çdo pushtet dhe mbi ligjin dhe Kushtetutën. Edi Rama hidhi sytë mbi këtë bulevard dhe nga sonte, ti kurrë nuk do të ndihesh më në Shqipëri, as në botë, si kryeministër, por si kapobandë,” tha Berisha.

Klevis Balliu në protestë: Të largojmë bandat e pushtetit dhe drejtuesin e narkoshtetit

Deputeti i Partisë Demokratike Klevis Balliu tha se qëllimi i kësaj proteste dhe të tjerave që do pasojnë është rrëzimi i narkoshtetit që sipas tij ka ngritur Edi Rama duke varfëruar përditë popullin.

“Një narkopushtet ka vjedhur çdo ditë duke i kthyer shqiptarët në popullin më të varfër me pushtetarët më të pasur të botës. Duhet të luftojmë që t’i çojmë në burg dhe t’u konfiskohen  të gjitha paratë që iu ka vjedhur ju. Këtu në këtë protestë nuk janë militantë të partisë, janë militantë të Shqipërisë që duan të largojnë narkoshtetin, sot është gjithë Evropa që fakton se Edi Rama është kryetari i një narkoshteti.

Salianji nga protesta: Nuk më përjashton dot askush nga PD

Salianji theksoi se do vijojë të jetë pjesë e PD-së dhe nuk përjashtohet dot nga askush. Ai thekson se lëvizja që ai drejton në PD ka pasur peshë mjaftueshëm sa për ta ndryshuar këtë parti.

“Mesazhi është për të gjithë qytetarët për të protestuar dhe larguar qeverinë. Mua nuk më përjashton dot asnjë njeri, sot është radha për të përjashtur Edi Ramën.

Kemi ardhur me mbështetësit e PD-së, unë jam në PD , do jem në PD. Jam drejtues i një lëvizje shumë të rëndësishme për PD-në. Partia ka ndryshuar pas kësaj lëvizje. Unë po punoj në PD, por ka një qëndrim të qartë se PD dhe opozita duhet të jetë më e fortë për të mos qëndruar në këmbë qeveria.

Sot ta kemi fokusin këtu. Kam zgjedhur të takoj njerëzit këtu sepse nuk jam organizator, jam këtu si demokrat”.

Belind Këlliçi paralajmëron policin: Kujdes se e kam personale, guxo dhe një herë

Në protestën që po zhvillon Partia Demokratike së bashku me një numër të madh militantësh, ka folur në podium edhe deputeti i PD-së Belind Këlliçi.

“Demokracia nuk vdes në një ditë, vetëm kur njerëzit binden se nuk ka alternativë. E nisëm betejën kur kemi qenë shumë pak, qëndruam dhe protestuam për 44 javë rresht. Ne të gjithë së bashku do ta bëjmë aktin e fundit. Këmbanat që bien po kujtojnë se pushteti nuk është i përjetshëm.

Kam një mesazh personal për komisariatin numër 4 në Tiranë.

Harroje shantazhin ndaj demokratëve me deklaratën ku kërkoje sot me shkrim që të firmosin demokratët për të mos marrë pjesë në protesta. Ne nuk të llogarisim. Guxo ti dhe shefat e tu edhe një herë të vetme ti bini në qafë demokratëve, dhe do merremi personalisht me ju, një e nga një”.

LEXONI GJITHASHTU:

• Ish-deputeti Sula: Protestat e PD-së nuk e gudulisin mazhorancën, nuk rrisin tension
• EKSKLUZIVE/ Diskutime për grevë urie në Grupin e PD-së, ja deputetët që e propozuan