Partia Socialiste fiton mandatin e tretë, analistët diskutojnë në “Ilva Now”

Partia Socialiste e Shqipërisë ka arritur të fitojë mandatin e tretë në zgjedhjet parlamentare që u mbajtën të dielën.

Analistët dhe njohësit e mirë të situatës politike në vend diskutuan me argumente në emisionin “Ilva Now” në Euronews Albania.

Analisti Redi Shehu thotë se mandati i tretë i PS është një gur historik për një lider politik, por njëherësh dhe një përgjegjshmëri e madhe.

“Mandati i tretë do të jetë një gur historik për një lider në Shqipëri, por unë dyshoj që Rama të mund ta shkruajë ashtu sikurse deklaroi në deklaratën e tij këtë histori, Basha me fjalimin e tij kam frikë se nënshkroi “Ramën deri në 2029-ën”. Duket sikur nuk ka farë reflektimi apo pranimi rezultati”, tha ai.

Gazetari dhe drejtuesi i emisionit “Me pak Fjalë” në Euronews Albania, Neritan Sejamini pohon se Partia Demokratike duhet të pranojë humbjen pasi çdo manovër tjetër nuk i shërben rritjes së saj.

“PD i ka humbur zgjedhjet, pikë. Kjo duhet analizuar si humbje. Pasi nëse nuk shihet si e tillë nuk i shërben PD. PD në shtator do të hyjë në Kuvend, të marrë vendet dhe të bëjë politikë”, tha Sejamini.

Deputeti Ralf Gjoni theksoi se drejtuesit e PD dhe të LSI duhet të japin dorëheqje pasi janë  përgjegjësit kryesorë për humbjen në zgjedhje.

“Duhet reformimi i sistemit politik. Hapi i parë është dorëheqja e liderit të partisë më të madhe opozitare, sepse kjo nuk është fitore e Ramës, por është humbje e Bashës. LSI po shkon drejt avullimit dhe shumë shpejt do jetë zero. Monika Kryemadhi duhet të dorëhiqet sot, se nesër është shumë vonë”, u shpreh z. Gjoni.

Drejtuesja e IMDC-së, Jonila Godole, thekson faktin se skema jo-ligjore e “patronazhimit” ka prodhuar mandate për Partinë Socialiste.

“Unë mendoj se patronazhimi duke shkelur shumë të drejta tona personale, duke intimiduar njerëz, mendoj se i kanë sjellë mandate PS. Unë mendoj se kanë bërë [qytetarët] një zgjedhje inteligjente nëse përkundrejt votës kanë marrë një shërbim”, tha ai.

Pedagogia Iris Luarasi, shprehet se ftesa e Ramës drejtuar PD-së nuk është ftesa për bashkëqeverisjes, por nevojë për të kaluar ligje të rëndësishme, të cilat kërkojnë 84 vota në Kuvend.

“Këtë e shikoj jo si një thirrje për bashkëqeverisje, por si një thirrje për ligjet të caktuara që kërkojnë 84 vota dhe kërkojnë padiskutim edhe bashkëpunimin e opozitës”, tha ajo.