LSI në Korçë, akuza për PS e PD, Braimllari: Humbja e mandatit tonë, si pasojë e vjedhjes së votave 

LSI në Korçë nuk e shikon tek vetja humbjen e mandatit që kjo parti mbante në këtë qark. Kryesuesi i listës së LSI-së në Korçë, Endrit Braimllari, akuzon PS-së për presione, manipulime dhe blerje votash që çuan në humbjen e mandatit të kësaj partie në qarkun e Korçës.

“Kam bindjen maksimale që votat janë në kuti dhe rezultati është manipuluar gjatë procesit por edhe përpara se të shkojë vota në kuti. Presioni ka qenë i jashtëzakonshëm dhe duke ofruar para”, tha Braimllari.

Drejtues i LSI për qarkun e Korçës shkon më tej teksa shprehet se është kërcënuar nga disa eksponentë të PS, të cilët dosjen e tyre me ligjin e kanë të errët. Por jashtë kritikave nuk mbetet edhe vetë aleati i LSI-së partia Demokratike

“Kam një vlerësim për strukturat lokale në Korçë të PD, kanë treguar vërtetë një heroizëm duke nisur nga kryetarja e PD për Korçën. Personazhe të tjerë qesharakë, brenda një institucioni të tillë mendoj që kanë krijuar njëlloj divergjence që nuk është në nderin e Korçës”, u shpreh Brahimllari.

11 mandatet e qarkut të Korçës u ndanë në dy fronte, ku PS mori 6 mandate ndërsa Partia Demokratike 5 mandate.