Lufta me flakët në Greqi, shefi i ekipit zjarrfikës shqiptar rrëfen eksperiencën

Shefi i ekipit shqiptar operacional zjarrfikës që udhëtoi drejt Greqisë për të ndihmuar në shuarjen e zjarreve tha në një intervistë për Euronews Albania se realizuan 14 ditë operacion shpëtimi në shtetin fqinj.

Leonard Qyra tregoi se shërbimet e tyre i përqëndruan në zonën e Aleksandropolit, aty ku ishte dhe lufta më e fortë me flakët. Ai ishte duke u kthyer për Shqipëri, ndërsa sqaroi se pyjet e Dadias kanë qenë gjithashtu në fokusin e tyre gjatë qëndrimit në Greqi.

“Fatkeqësisht janë djegur pjesa më e madhe e pyjeve dhe shpresojmë që ato të rigjenerohen sepse një pjesë e tyre edhe mund të rigjenerohen pasi zjarri nuk i ka djegur të gjitha. Nuk mund të themi një shifër të saktë, por unë mendoj se mund të jenë rreth 100 mijë hektarë. Ka pasur pafund sipërfaqe të djegura.

Kishim 5 mjete zjarrfikëse dhe 4 mjete të tjera mbështetëse, 1 autoambulancë dhe 3 mjete për transportin e personelit. Kemi shërbyer jashtëzakonisht shumë mirë dhe kemi marrë vlerësime shumë të mira,” – u shpreh Qyra.

Ai tregoi gjithashtu se lufta me flakët ka qenë e vështirë, por fatmirësisht gjithçka shkoi mirë dhe pa incidente. Sipas zjarrfikësit situata është ndihmuar dhe nga bashkëpunimi i ekipit me punonjësit lokalë.

LEXONI GJITHASHTU:

• Përfshihet nga zjarri banesa në Lazarat, ndërhyjnë zjarrfikësit
• Rëndohet situata në Alexandropoli, zjarrfikësit shqiptarë luftë me flakët