Luftime të ashpra në Kharkiv, Rusia pretendon për avancim: Morëm 5 fshatra

Luftime të ashpra shpërthyen të shtunën për kontrollin e disa fshatrave ukrainase pranë kufirit me Rusinë, mes përpjekjesh të ushtrisë ruse për të dëshmuar forcë në rajonin verilindor të Kharkivit.

Rusia thotë se trupat e saj kanë avancuar, ndërkohë që Nazar Voloshyn, një zëdhënës i ushtrisë së Ukrainës në lindje, këmbëngul se trupat e Moskës nuk kanë avancuar në ato fshatra.

“Armiku është i përmbajtur në zonën gri dhe nuk po zgjerohet,” tha ai në një intervistë televizive, sipas Kyiv Independent.

Guvernatori i rajonit të Kharkiv tha se luftimet e ashpra po vazhdojnë ende.

“Deri tani armiku vazhdon të ushtrojë presion në veri të rajonit tonë. Forcat tona kanë zmbrapsur nëntë sulme”, njoftoi guvernatori Oleh Syniehubov në një konferencë për shtyp.

Ministria ruse e Mbrojtjes tha se forcat e saj kishin marrë pesë fshatra kufitare në rajonin e Kharkivit.

Megjithatë zoti Syniehubov tha se përleshjet po vazhdojnë në të pesë fshatrat që ndodhen brenda një zone rreth pesë kilometra larg kufirit rus.

Ushtria ukrainase tha se ishin dërguar përforcime në rajon për të ndihmuar në stabilizimin e pozicioneve si dhe për të kufizuar përparimin e Rusisë, pas fillimit të një ajo ofensive të re të Moskës të premten.

Syniehubov tha se autoritetet rajonale kishin evakuuar më shumë se 2,500 persona nga zonat kufitare dhe se ky proces po vazhdon.