Macron: Kurdët francezë viktima të një sulmi të tmerrshëm 

Presidenti i Francës, Emmanuel Macron, tha sot në lidhje me të shtënat në qendër të Parisit, se kurdët francezë ishin shënjestër e një sulmi “të urryer”, duke dërguar ngushëllimet e tij për familjet e viktimave dhe mbështetjen për të plagosurit.

“Kurdët francezë janë objektivi i një sulmi të tmerrshëm në zemër të Parisit. Mendimet tona janë me viktimat, njerëzit që luftojnë për jetën e tyre, familjet dhe të dashurit e tyre,” shkroi Macron në Twitter.

Televizioni francez BFM raportoi se tre persona u vranë dhe katër të tjerë u plagosën nga të shtënat në qendër të Parisit kur një 69-vjeçar hapi zjarr ndaj këmbësorëve në një rrugë pranë Qendrës Kulturore Kurde.

Televizioni njoftoi se sulmuesi ishte arrestuar dhe se policia i kishte kërkuar publikut që të qëndronte larg nga rrethi i dhjetë i Parisit, ku ndodhën të shtënat.

Personi i arrestuar për të shtënat është i njohur për autoritetet franceze sepse ai sulmoi një kamp emigrantësh një vit më parë, raportoi Reuters.