Mali i Zi, protesta të dhunshme kundër kurorëzimit të kreut të Kishës Serbe

Policia në Malin e Zi ka përdorur gaz lotsjellës ndaj protestuesve që po përpiqen të bllokojnë emërimin e kryepeshkopit të ri të Kishës Ortodokse Serbe.

Turma e irrituar gjuajti me gurë policinë dhe rrëzoi gardhet e sigurisë përreth manastirit në qytetin Cetinje.

Por pavarësisht protestave, ardhja në fron e Joanikije II vijoi siç ishte planifikuar ditën e diel.

Sidoqoftë, eventi ka nxjerrë në dukje ndasitë që ekzistojnë në vend, që u shkëput nga unioni me Serbinë në vitin 2006.

Kisha Ortodokse Serbe është instituti më i lartë fetar i krishterë në Malin e Zi, por ka qenë në konflikt me presidentin Milo Gjukanoviç.

Ky i fundit akuzon kishën se po përpiqet të minojë pavarësinë e vendit dhe që ta kthejë Malin e Zi sërish nën kontrollin e Serbisë.

Presidenti u kishte bërë thirrje protestuesve që të pengonin përurimin e Joanikije II në postin më të lartë klerik, i njohur si kryepeshkopi i Cetinjes.

Të shtunën, disa qindra manifestues ngritën barrikada për të penguar aksesin në këtë qytet. “Po ngremë barrikada pasi jemi ngopur me ndikimin e Beogradit që mohon shtetin tonë dhe na thotë se cilat janë të drejtat tona fetare”, deklaroi një protestues për agjencinë e lajmeve “Reuters”.

Për manifestuesit, çdo objekt kulti i ndërtuar në Malin e Zi i përket popullit dhe këtij shteti.