Manifestim të paligjshëm gjatë ndeshjes, në hetim 6 persona, 1 mln lekë gjobë pronarit të lokalit

Gjashtë persona do të ndiqen penalisht në gjendje të lirë për manifestim të paligjshëm gjatë ndeshjes Tirana-Kukësi, e luajtur dje në stadiumin “Selman Stermasi”. Ndërkohë që zhvillohej ndeshja me një stadium pa praninë e tifozëve, një grup tifozësh të skuadrës Tirana u mblodhën pranë stadiumit, në shkelje të protokolleve të sigurisë për parandalimin e përhapjes së COVID-19, duke prishur rendin dhe qetësinë publike dhe duke kundërshtuar urdhrin e punonjësve të Policisë për t’u shpërndarë.

Pas veprimeve hetimore nga ana e Seksionit për Hetimin e Krimit në Komisariatin e Policisë Nr. 2 Tiranë, janë identifikuar dhe proceduar në gjendje të lirë gjashtë persona të cilësuar si organizatorë, ndaj të cilëve janë ngritur veprat penale “Mosbindja ndaj urdhrit të punonjësit të policisë së rendit publik”, “Prishja e qetësisë publike” dhe “Organizimi dhe pjesëmarrja në grumbullime e manifestime të paligjshme”.

Gjithashtu, në bashkëpunim me Inspektoratin Shtetëror Shëndetësor, u gjobit me 1 milion lekë të reja pronari i një lokali në afërsi të stadiumit, pasi lejoi të futeshin dhe të qëndronin në ambientet e brendshme të lokalit, tifozët që nuk po zbatonin urdhrin e Policisë për t’u shpërndarë dhe respektuar distancimin social, urdhër i dhënë disa herë me megafon, që prej fillimit të grumbullimit të paligjshëm e deri në shpërndarjen e plotë të tyre.