Marina amerikane do të fillojë shoqërimin e anijeve përmes Ngushticës së Hormuzit

Sekretari amerikan i Energjisë, Chris Wright ka deklaruar këtë të premte se Marina Amerikane do të fillojë shoqërimin e anijeve përmes Ngushticës së Hormuzit sapo asetet ushtarake në rajon të jenë në gjendje ta largojnë vëmendjen nga sulmet hakmarrëse të Iranit ndaj vendeve fqinje.

Wright në një intervistë i tha Fox News se eskortat detare do të fillojnë sa më shpejt të jetë e mundur.

“Tani për tani, të gjitha asetet ushtarake amerikane, i gjithë fokusi i tyre tani është të shtypin aftësinë e Iranit për të shkaktuar kaos mbi fqinjët e tyre dhe mbi amerikanët në zonë”, tha Wright.

“Pra, së pari, duhet ta zvogëlojmë aftësinë e tyre për të shkaktuar probleme dhe pastaj, sapo të jetë e arsyeshme ta bëjmë këtë, do të eksportojmë anije përmes ngushticës dhe do ta vëmë energjinë në lëvizje përsëri”, shtoi ai.

Sekretari u përpoq të minimizonte problemin e rritjes së çmimeve të benzinës duke thënë se është çështje javësh.

Wright tha gjithashtu se njoftimi i administratës se do t’i lejonte Indisë të blinte naftë ruse për 30 ditë nuk përfaqëson një ndryshim në politikën kundër Rusisë, por është një veprim i përkohshëm për të parandaluar ndërprerjet në tregun global të energjisë gjatë luftës.