Marjo Përlleshaj apelon vendimin për vrasjen e Martin Canit! Mbrojtja: Akuza nuk qëndron

Marjo Përlleshaj, i dënuar për vrasjen e Martin Canit, ka vendosur të ankimojë vendimin e shkallës së parë, e cila e dënoi me 16 vite burg.

Burime nga sistemi gjyqësor bëjnë me dije se avokati i mbrojtjes së Përlleshajt ka argumentuar se ndaj të mbrojturit të tij nuk mund të rëndojë akuza për vrasje me rrethana cilësuese, siç e kishte vlerësuar gjykata e shkallës së parë.

Në apël, mbrojtja pretendon se krimi ka ndodhur në kushtet e vetëmbrojtjes dhe për shkak të tronditjes së fortë psikike. Të njëjtat argumente ishin parashtruar edhe në shkallën e parë, por nuk u morën parasysh nga gjykata.

Më 9 dhjetor të vitit të kaluar, Përlleshaj u dënua me 12 vite për vrasjen e Martin Canit dhe 10 vite për tentativën e vrasjes së një të mituri tjetër. Në bashkim të dënimeve, ai mori gjithsej 16 vite burg.

Ngjarja e rëndë ndodhi në ambientet e shkollës “Fan Noli”, ku një konflikt mes të miturve përfundoi me përdorimin e thikës. Si pasojë, Martin Cani mbeti i vrarë, ndërsa shoku i tij, Luis Mecaj, u plagos dhe u dërgua për ndihmë mjekësore.

Pas hetimeve, Prokuroria ngriti akuzat për vrasje dhe plagosje të rëndë, duke kërkuar dënim maksimal, por gjykata vendosi një masë më të ulët se ajo e kërkuar nga organi i akuzës.