“Marrëdhëniet me shtetin, zanafilla e konflikteve mes qytetarëve”, gazetari Kikia analizon ngjarjen e rëndë në Velipojë

Gazetari Mentor Kikia tha në një intervistë për Euronews Albania se ngjarja që ndodhi në Velipojë, ku katër persona mbetën të vrarë dhe dy të plagosur, në një konflikt të krijuar prej shezlongëve, ka si prapavijë marrëdhëniet me shtetin.

“Mendoj që arsyeja kryesore dhe më e madhe është marrëdhënia që ne kemi me shtetin. Ne nuk e njohim shtetin si arbitër, nuk e njohim shtetin si institucionin që duhet të zgjidhë problemet që ne kemi me njëri-tjetrin”, tha z. Kikia.

Sipas tij, nuk është aspak e çuditshme që edhe pronari i shezlongëve të djegur në Dhërmi të përpiqet ta zgjidhë vetë problemin, duke qenë se ende nuk ka ndonjë denoncim nga ana e tij në polici, pavarësisht se është në dijeni për autorët.

Drejtuesi i emisionit “Përse” në Euronews Albania, u shpreh se si pasojë e mungesës së kulturës së veprimit të shtetit, qytetarët përpiqen t’i gjejnë vetë zgjidhje problemeve e rrjedhimisht kjo prodhon konflikte.

Duke qenë se koncepti i hapësirës publike nuk është ende i qartë, gazetari ishte i mendimit se sipas tij të tilla konflikte do të vijojnë, ndërsa puna kaotike e shtetit është dhe zanafilla e gjithë këtyre situatave.

Sa i takon deklaratës së kryeministrit, i cili tha se nuk do të pritet fundi i verës për ristrukturimin e Policisë, Kikia u shpreh se ligjet janë mjaftueshëm të forta, por thjesht nuk zbatohen.

LEXONI GJITHASHTU: 

• “Mos i ndodhtë askujt”, babai i vëllezërve të vrarë në Velipojë tregon se sherri nisi për shezlongët
• Ngjarja e rëndë në Velipojë, policia arreston dy persona, tre në kërkim
• Ngjarja në Velipojë, Voltana Ademi: Policia ka pasur informacion për debatet mes familjeve