Marrëveshja me Serbinë, Kurti prezanton 4 qëndrimet e tij, Von der Leyen: Palët të takohen sa më shpejt

Kur pritet që në 25 korrik të zhvillohet raundi tjetër i bisedimeve Kosovë-Serbi, kryeministri i Kosovës, Albin Kurti prezantoi katër qëndrimet e tij për ecjen përpara në marrëdhëniet mes Kosovës dhe Serbisë.

Gjatë mbledhjes së Këshillit të Përgjithshëm të Lëvizjes Vetëvendosje, Kurti u shpreh se dialogu mes dy vendeve nuk mund të vazhdojë pafundësisht. Ai tha se dialogu dhe bisedimet nuk janë për statusin e Kosovës, por për statusin e marrëdhënieve mes Kosovës dhe Serbisë.

Si pikë të dytë, ai ka përmendur një marrëveshje që ka formën dhe përmbajtjen e një marrëveshjeje ndërkombëtare. Ndërsa, si pikë të katërt Kurti nënvizoi se “pavarësia e Kosovës është kompromis i shpallur 13 vite më parë”.

Shefja e Komisionit Europian, Ursula von der Leyen, mirëpriti zotimin e kryeministrit të Kosovës, Albin Kurti për t’u angazhuar në këtë proces, të ndërmjetësuar nga Bashkimin Evropian.

Zyra për Komunikim e Qeverisë së Kosovës bën me dije se Kurti ka marrë një letër nga shefja e ekzekutivit evropian, në të cilën ajo e ka konsideruar thelbësore mbajtjen e takimit të ardhshëm për dialogun sa më shpejt që është e mundur.

Takimi i fundit i zhvilluar në Bruksel në 15 qershor mes presidentit Vuçiç dhe kryeministrit Kurti ishte i tensionuar dhe palët nuk ranë dakord për asnjë çështje të prezantuar.

LEXONI GJITHASHTU:

• “Dialogu me letrat e vjetra”, Xhavit Haliti: Negociatat nuk fillojnë nga zero
• Analisti Rama: Vizita e Kurtit në Francë, një përpjekje e BE-së dhe SHBA-së për të gjetur zgjidhje për dialogun