Masat anti-COVID detyrojnë shtyrjen e nisjes së sezonit të ri në Formula 1

Masat kufizuese të vendosura në Kinë dhe Australi kanë detyruar Formulën 1 që të shtyjë nisjen e sezonit të ri.

Në kalendarin provizor të miratuar në nëntor 2020, garat qenë vendosur të nisnin më 19-21 mars me Çmimin e Madh të Australisë, mirëpo situata e pandemisë ka bërë që sezoni të vijojë direkt me garën e dytë, atë të 26-28 marsit në Bahrejn.

Gara australiane është shtyrë për në datat 19-21 nëntor, ndërkohë që në kalendar është spostuar edhe Çmimi i Madh i Kinës. Në datat 16-18 prill, ku qe parashikuar kjo garë është vendosur gara e Imolas në Itali.

Federata Botërore e Automobilizmit dhe organizatorët e Formulës 1 u shprehën të kënaqur me faktin që pavarësisht ndryshimeve numri total i garave për sezonin e ardhshëm nuk ka ndryshuar.

Sidoqoftë mbetet për t’u konfirmuar gara e tretë e kalendarit Çmimi i Madh i Portugalisë, i parashikuar për t’u zhvilluar më 2 maj.

Entuziazëm ndërkohë ka nxitur lajmi i konfirmimit të Imolas, e cila ka mirëpritur gara për 27 vite radhazi prej vitit 1980, mirëpo prej nëntorit 2006 e deri nëntorin e vitit të kaluar nuk pati zhvilluar gara.