Masat kufizuese, deputetja e AAK-së Albena Reshitaj: Kundër mbylljes së plotë, ka ende mundësi për masa të ndërmjetme

Deputetja e Aleancës për Ardhmërinë e Kosovës Albena Reshitaj sqaroi për Euronews Albania pikat mbi të cilat u kundërshtuan masat e reja të qeverisë ndaj COVID-19.

“Është arritur një dakordësi që të mos shkohet në mbyllje totale, por të ketë vetëm masa shtesë që të garantojnë mbarëvajtjen e procesit mësimor dhe garantojnë një pjesë të ekonomisë që të vijojë, masat janë ndarë në zonat në bazë të rrezikshmërisë së infektimit, prandaj ne si AAK kemi reaguar që të mos shkojmë në mbyllje totale, pasi mendojmë se ende ka kohë dhe se mund të shfrytëzohen të tjera masa alternative që mund ta shmangin mbylljen totale,” – u shpreh Reshitaj.

Deputetja e AAK-së theksoi se qeveria duhet të dëgjojë ekspertët e shëndetësisë dhe të mos ngutet me qasje më të forta për menaxhimin e pandemisë. Reshitaj e cilësoi të saktë sjelljen e mëpasshme të qeverisë për t’i aplikuar masat vetëm në zonat më problematike.

E pyetur nëse do të arrihet në një marrëveshje për zgjedhje ne presidentit të ri të Kosovës, Reshitaj tha se vëmendja kryesore e politikës është te çështja e gjyqit ndaj ish-udhëheqësve të UÇK-së.

“Zgjedhja e presidentit nëse do të jetë e përshpejtuar, do të duhet të jetë pjesë e veçantë e diskutimeve brenda spektrit politik, me rëndësi është të ruhet dinjiteti dhe vlera e UÇK-së, pasi po përpiqen ta njollosin,” – u shpreh Reshitaj.