Maska me detyrim, qytetarët: Në ambiente të caktuara s’është e nevojshme, ka kosto

Nisur nga dita e enjte vendosja e maskës do të jetë me detyrim në çdo ambient edhe në mjediset e jashtme. Vendimi i bërë me dije nga kryeministri Rama përcakton se për mosrespektimin e tij qytetarët do të ndëshkohen dhe gjoba do t’i shkojë çdo qytetari bashkë me faturën e dritave.

Euronews Albania ka intervistuar qytetarët në disa rrugë të kryeqytetit për të kuptuar qëndrimet e tyre.

Një pjesë e tyre janë shprehur skeptik.

“Jam dakord në ambientet e mbyllura, në ambientet ku ne rrimë afër njëri-tjetrit patjetër që duhet. Po ç’nevojë ka që unë ta mbaj në mes të pyllit maskën, apo ç‘nevojë ka që unë ta mbaj maskën në makinën time”,- u shpreh një qytetar.

Ndërkaq ka pasur dhe të tjerë që kanë pasur një qasje pozitive ndaj vendimit.

“Jo më pak se dy minuta dikush teshtiu dhe gati sa nuk ma hodhi në fytyrë, nuk ndan dot kush është njeriu e kush është kafsha, me gjithë respektin që duhet të kemi për qenien si njeri. Kështu që mendoj që është i drejtë si vendim”,- u shpreh një e moshuar.

Ndër shqetësimet kryesore ka qenë dhe pjesa ekonomike. Sipas qytetarëve blerja e maskave nuk është diçka që mund ta përballojë çdo familje.

“Po nuk na del buxheti të marrim pesë maska në ditë ne që jemi pesë familjarë. Na del hesapi? Nuk na del, po shumë mirë është t’i mbash s’është keq”