Mbërrijnë ​në Kosovë dozat e para “Pfizer” të blera nga qeveria Kurti

Kanë mbërritur në Kosovë dozat e para të vaksinës kundër COVID-19 të “Pfizer”, të siguruara nga kontrata e firmosur mes Ministrisë së Shëndetësisë dhe prodhuesit amerikan.

Pas këtij hapi, ministria thekson se vaksinimi do të shtrihet tek kategoritë e tjera të popullatës deri në arritjen e objektivit, që është: vaksinimi i 60% të qytetarëve brenda vitit 2021.

“Këto vaksina do të ndihmojnë edhe më shumë punëtorët tanë shëndetësor, të cilët kanë qenë në ballë të betejës kundër pandemisë COVID-19 që nga dita e parë. Duke qenë se pandemia nuk është vetëm çështje e shëndetit publik, Ministria e Shëndetësisë dhe ekspertët shëndetësor kanë vënë prioritet vaksinimin në masë, për të siguruar kështu funksionimin normal të veprimtarive shoqërore që mundësojnë kthimin në një normalitet social dhe ekonomik për qytetarët dhe bizneset në Kosovë”, thekson ministria.

Për Ministrinë e Shëndetësisë, përveç sigurimit të vaksinave për të gjithë qytetarët, prioritet ka qenë që vaksinat të cilat administrohen në Republikën e Kosovës, të jenë vaksina të aprovuara nga EMA Evropiane dhe FDA Amerikane, dhe kështu vaksinat kundër COVID-it janë të sigurta dhe forma më efikase në përballjen me pandeminë.

Pavarësisht sigurimit të vaksinave, MSH-ja kërkon nga qytetarët të respektojnë masat parandaluese sikurse janë distanca fizike, mbajtja e maskës, ajrosja e hapësirave të mbyllura dhe ruajtja higjienës personale.