Mbërrijnë 25 mijë vaksina Sputnik, Manastirliu: Jemi gati për të ulur fashën e vaksinimit

Ditën e sotme kanë mbërritur 25 mijë doza të vaksinës Sputnik, për të vijuar procesin e vaksinimit masiv në të gjithë vendin.

Ministrja e Shëndetësisë dhe Mbrojtjes Sociale, Ogerta Manastirliu, nga Instituti i Shëndetit Publik, deklaroi se deri tani janë mbi 936 mijë vaksina të mbërritura në vend.

“823 mijë vaksina janë administruar në total përsa i përket grupeve të popullatës, por gjithashtu edhe grupeve të riskuara, në bazë të planit tonë të kombinuar të vaksinimit”, tha Manastirliu.

Duke theksuar se do të vijojmë me planin kombëtar të vaksinimit, Manastirliu shtoi se do të ulet fasha e vaksinimit.

“Tashmë jemi gati për të ulur fashën e vaksinimit, duke e filluar nga +59 vjeç, +58, +57 vjeç. Ndaj ftojmë të gjithë qytetarët që të aplikojnë në portalin e-Albania për t’u bërë pjesë e vijimit të kalendarit të vaksinimit, gjithashtu të kontaktojnë drejtpërdrejt me mjekun e familjes për të marrë datën e vaksinimit”, bëri me dije Manastirliu.

Duke folur për situatën e kontrolluar epidemiologjike, ministrja bëri sërish apel qytetarëve për të vijuar të kenë kujdes dhe të respektojnë protokollet shëndetësore të vendosura edhe gjatë sezonit turistik.

Prej fillimit të procesit të vaksinimit janë kryer në total 823,053 doza të vaksinës anti-COVID19. Prej tyre 324,616 qytetarë i kanë marrë të dyja dozat e vaksinës.

LEXONI GJITHASHTU:

Nis sot vaksinimi i taksistëve, hyjnë në fuqi lehtësimet e masave kufizuese

Masat për sezonin turistik, Manastirliu: Më 15 qershor do të hapen qendrat shëndetësore verore