Mbërrijnë 38 mijë dozat e vaksinës “AstraZeneca”

Kanë mbërritur në Shqipëri mbrëmjen e kësaj të premteje 38400 dozat e para të vaksinës “AstraZeneca”. Kryeministri i vendit, Edi Rama paralajmëroi së në ditët në vijim priten të vijnë edhe sasi të tjera vaksinash për t’i dhënë hov këtij procesi.

“Nesër ne do nisim menjëherë vaksinimin për mësuesit dhe pedagogët dhe do ta shtrijmë me shpejtësi në të gjithë territorin e vendit duke i kthyer shkollat në një pikë vaksinimi në një pjesë të konsiderueshme. Me kompaninë AstraZeneca kemi edhe 60 mijë doza, që do jenë këtu në muajin prill dhe po ashtu me Pfizer kemi  30 mijë të tjera, që vijnë në muajin prill”, tha Rama.

Ai tha se Shqipëria është e gatshme të ndihmojë Kosovën me dozat e nevojshme për mjekët dhe infermierët e spitaleve Covid.

“Jemi gati, nga dita e nesërme, të organizohemi së bashku me Kosovën për t’ju dhënë mjekëve dhe infermierëve të spitaleve covid, duke filluar nga spitali Covid i Prishtinës që të vijnë dhe të vaksinohen në Kukës, i presim me shumë kënaqësi vëllazërisht, që nesër”, shtoi Rama.

Kjo sasi vaksinash vjen në një kohë, që “AstraZeneca” po përballet me dyshime për efekte anësore te personat, të cilat e marrin këtë vaksinë. Vende si Danimarka, Norvegjia dhe Islanda pezulluan përdorimin e vaksinës për të zbuluar nëse vaksina kishte ndikime.