Mbetjet e dy pengjeve nga Rripi i Gazës kalojnë në territorin izraelit

Forcat e Mbrojtjes së Izraelit (IDF) dhe Agjencia e Sigurisë (Shin Bet) kanë transferuar në territorin izraelit mbetjet mortore të dy pengjeve, të enjten në mbrëmje, bëri të ditur Zyra e Kryeministrit të Izraelit.

Sipas njoftimit, Kryqi i Kuq Ndërkombëtar ka mbledhur eshtrat nga Hamasi dhe më pas i ka dorëzuar ato autoriteteve izraelite. Mbetjet do të identifikohen në Institutin Kombëtar të Mjekësisë Ligjore për konfirmim zyrtar të identitetit të tyre.

Ky zhvillim erdhi pas deklaratës së Hamasit, e bërë rreth orës 16:00, se do të dorëzonte trupat e dy pengjeve të vrarë në Gaza. IDF konfirmoi marrjen e tyre në orën 16:46.

“Jemi të vendosur t’i kthejmë të gjithë pengjet tona, të gjallë apo të rënë. Sot kemi marrë edhe dy të tjerë – dhe nuk do të ndalemi derisa t’i kthejmë të gjithë në shtëpi,” deklaroi kryeministri Benjamin Netanyahu gjatë një ceremonie diplomimi të oficerëve të IDF-së.

Sipas Hamasit, eshtrat janë gjetur gjatë gërmimeve në qytetin e Gazës të martën në mbrëmje, dhe grupi publikoi edhe emrat e pengjeve në njoftimin e tij.

LEXONI GJITHASHTU:

• Dëme, viktima dhe të plagosur/ Moska sulmon rrjetin elektrik të Ukrainës
• Kompania Lukoil pranon ofertën për shitjen e aseteve jashtë Rusisë