Mbi 1 mijë të infektuar në ditë, Maqedonia e Veriut po përballet me mungesë të shtretërve në spitale

Maqedonia e Veriut po përballet me mungesë serioze të shtretërve dhe kuadrit mjekësor që do të ndihmonte në luftën kundër COVID-19.

Pavarësisht se janë përshtatur hapësira edhe të spitaleve të tjera për të sistemuar të sëmurët, si dhe po angazhohen edhe studentët që janë në specializim, vërehen mungesa dhe problematika, pasi numri i të infektuarve, është duke kaluar 1 mijë në ditë.

Sipas të dhënave nga Shëndetësia, 1 ndër 10 persona, kanë nevojë të shtrohet në spital për mjekim më të specializuar.

Vetëm gjatë ditës së djeshme u regjistruan 1128 të infektuar dhe 12 të vdekur, ndërsa numri i personave të infektuar për momentin me COVID-19 ka arritur në 13.568.