Mbi €460 milionë shpenzime për një muze, tjetër akuzë për shpërdorim ndaj ish-presidentit të FIFA-s Sepp Blatter

Federata Ndërkombëtare e Fubtollit (FIFA) ka ngritur një kallëzim penal ndaj ish-presidentit të saj Sepp Blatter lidhur me financimet e një muzeu në Zyrih të Zvicrës.

Kallëzimi ka të bëjë me përfshirjen e Blatterit, 84 vjeç, dhe ish zyrtarëve të tjerë në projektin tejet të kushtueshëm të rinovimit të muzeut FIFA, muze që nuk zotërohet nga federata.

Kjo është një tjetër akuzë për Blatterin, i cili në vitin 2015 u dorëhoq si drejtues i FIFA-s pas skandaleve të korrupsionit që përfshinë federatën.

Tetëdhjetekatërvjeçari ka mohuar akuzat dhe përmes avokatëve të tij i ka cilësuar ato të pabaza.

FIFA, organi më i lartë qeverisës i futbollit, pretendon se administrata e mëparshme e Blatterit shpenzoi 500 milionë franga zvicerane (460 milionë euro) për të rinovuar “një ndërtesë që federata nuk e ka në pronësi” dhe “e ka mbërthyer atë në një marrëveshjeje qiraje afatgjate aspak të volitshme”.

Kallëzimi ndaj Blatterit është bërë prokurorisë së Zyrihut në Zvicër pasi FIFA kreu një audit, audit i cili ka nxjerrë si përfundim shpërdorimin e fondeve dhe dëm të madh ekonomik ndaj Federatës.

FIFA thotë se do të bashkëpunojë me prokurorinë helvete për të zhbërë dëmin që i ka ndodhur futbollit dhe për të dënuar “përgjegjësit e tyre”.

Projekti i muzeut filloi në 2013, dy vjet para se Blatter, i cili ishte president i FIFA-s për 17 vjet, të njoftonte dorëheqjen e tij.

Blatter aktualisht po vuan një ndalim gjashtë-vjeçar nga të gjitha organet qeverisëse të futbollit.