Mbi 53 mijë qytetarë nga Kosova zgjodhën bregdetin shqiptar për të pushuar

Mbi 53 mijë qytetarë të Kosovës zgjodhën të pushojnë në Shqipëri që nga e premtja e deri të hënën, favorizuar edhe nga moti me diell.

Por shkak janë bërë edhe ditët e pushimit, që përkojnë më Ditën Ndërkombëtare të Punës dhe Pashkët.

Sipas policisë së Kosovës, referuar shifrave zyrtare të hyrje-daljeve në pikën e kalimit kufitar me Shqipërinë, 53588 qytetarë kanë hyrë në territorin shqiptar përgjatë 4 ditëve të fundit.

Festa zyrtare e 1 Majit që ishte të shtunën dhe festa tjetër, Pashkët ortodokse të dielën, për këto dy festa zyrtare në fundjavë, institucionet e shtetit do të pushojnë të hënën dhe të martën.

Për këto katër ditë pushim, sipas Policisë së Kosovës vetëm në pikat kufitare me Shqipërinë kanë kaluar 53 mijë e 588 qytetarë.

“Të premten më 30 prill, kanë kaluar kufirin 17 mijë 939, të shtunën më 1 maj 23 mijë e 516 dhe më 2 maj të dielën 12 mijë e 133 qytetarë”, thuhet nga Zyra për Marrëdhënie me Publikun në Policinë e Kosovës.

Qeveria e mëparshme në Kosovë me kryeministrin Avdullah Hoti kishte miratuar projektligjin, që në ditët e festave zyrtare, kur i bie e shtunë ose e diel, nuk do të pushohet më të hënën. Por duket se ky projektligj ka mbetur në sirtarët e Kuvendit të Kosovës.