Mbledhja e përbashkët Shqipëri-Kosovë, në tryezë dhe hekurudha me Serbinë

Të premten e 2 tetorit, Qeveria e Kosovës dhe ajo e Shqipërisë do të mbajnë mbledhjen e gjashtë të përbashkët, e cila do të zhvillohet në Shkodër.

Veç nënshkrimit të 15 marrëveshjeve të reja, pritet të bëhet edhe bilanci i zbatueshmërisë së marrëveshjeve paraprake.

Ndër marrëveshjet kryesore që pritet të firmosen në Shkodër janë bashkëpunimi në fushën e shëndetësisë sa i përket përballimit të COVID-19, bashkëpunimi në rast të fatkeqësive natyrore.

Por gjithashtu një tjetër vendim i rëndësishëm do të ketë të bëjnë me ngritjen e Grupit të Punës për krijimin e Fondit të Përbashkët në Mbështetje të Luginës së Preshevës.

Një tjetër pikë është ajo e bashkëpunimit për lehtësirat në procedurat doganore mes dy vendeve si dhe një sërë bashkëpunimesh në fushën e arsimit, kulturës dhe sportit.

Në diskutim do të jetë dhe një pikë që vjen si rrjedhojë e marrëveshjes së arritur në Uashington mes Serbisë dhe Kosovës, ku parashikohet ndërtimi i një linjë hekurudhore nga Beogradi në Durrës.

Për ndërtimin e hekurudhës që do t’i japë Serbisë dalje në detin Adriatik, pritet të ketë marrëveshje për kryerjen e një studimi fizibiliteti.