Mbyllet procesi i votimit në Serbi, 45.5% e qytetarëve zgjodhën nën masa të rrepta sigurie

Serbia ka mbyllur rreth një orë më parë procesin e votimit për zgjedhjet e përgjithshme parlamentare dhe ato lokale. Sipas të dhënave paraprake të siguruara nga Komisioni Zgjedhor, përqindja e pjesëmarrësve në votime ishte rreth 45.55% e elektoratit.

Qendrat e votimit u hapën në orën 7 të mëngjesit, ndërsa u mbyllën në orën 20: 00 të mbrëmjes. Zgjedhjet u mbajtën sot edhe në qendrat me shumicë serbe në shtetin e Kosovës, ndërsa kreu i Listës Serbe, Goran Rakiç, ftoi qytertarët të dalin masivisht në zgjedhje dhe të votojnë partinë e presidentit Aleksandar Vuçiç. 

Në Serbi, mbi 6,5 milionë banorë kishin të drejtë vote që të zgjedhin parlamentin e ri prej 250 deputetësh. Ata po ashtu votuan për përbërjen e re prej 120 anëtarësh të Kuvendit të krahinës autonome të Vojvodinës.

Qendrat e votimeve ishin të pajisura me maska për fytyrën dhe dezinfektues duarsh, të gatshme për të pritur votuesit, të cilët jo pak herë e kanë shprehur hezitimin për pjesëmarrje në zgjedhje nga frika e të infektuarit me Covid-19.

Sipas sondazheve të fundit, Partia Konservatore Popullore Serbe (SNS) e Vuçiç synon të mbledhë rreth 50% të votave. Partneri i koalicionit të Vuçiçit, Partia Socialiste, pritet të dalë i dyti me rreth 10%, ndërsa Aleanca Patriotike serbe (SPAS), e udhëhequr nga Aleksandar Sapiç, llogaritet e treta.

Lexoni gjithashtu: 

Sot mbahen zgjedhjet në Serbi, partitë shqiptare të bashkuara në koalicionin “Alternativa Demokratike Shqiptare”

Serbët hedhin votën dhe mbështesin Vuçiç: I ka kthyer krenarinë vendit

​Kosova po shkel Kushtetutën duke lejuar zgjedhjet e Serbisë në veri

Kreu i Listës Serbe në Kosovë fton elektoratin të votojë partinë e Vuçiç