I dënuar për vjedhje dhe lëndë narkotike, kush është 21-vjeçari që vrau policin në Lezhë

Aldi Rama, 21-vjeçari nga Lezha, që vrau me armë paraditen e sotme policin Saimir Hoxha ka qenë i dënuar me burg, por që për rrethanat familjare dhe moshën e re dënimi i qe kthyer në shërbim prove.

Rama qe dënuar fillimisht me 5 vite burg, për akuzat e vjedhjes dhe zotërimit të lëndëve narkotike. Kjo çështje bën fjalë për vitin 2018 kur ai ishte 18 vjeç.

Gjykata rishikoi vendimin duke marrë në konsideratë rrethanat familjare të Ramës. Ai rezulton të jetë rritur nga gjyshërit, pas ndarjes së prindërve në kohën kur ky ishte 12 vjeç. Mbi këto rrethana gjykata pati vendosur kthimin e dënimit në shërbim prove.

Shkak për arrestimin e Ramës në vitin 2018 ka qenë ish e dashura e tij, e cila e kishte kallëzuar në prokurori për vjedhje të celularit, si dhe dhënie të lëndëve narkotike.

Polici Saimir Hoxha u vra me armë zjarri në Ishull Lezhë ndërsa po patrullonte për kultivim bimësh narkotike.

Burime për Euronews Albania bëjnë me dije se autori i dyshuar i ngjarjes Aldi Rama ka qëlluar nga makina në drejtim të efektivit sapo ai e ka ndaluar për kontroll.

Duke qenë se autori i dyshuar ka hapur zjarr menjëherë ka qenë e pamundur që Saimir Hoxha të reagojë.

21-vjeçari është larguar me makinë nga vendngjarja. Policia e Shtetit ka ofruar 20 mijë euro për këdo që ndihmon në kapjen e tij duke siguruar ruajtjen e plotë të anonimatit.

LEXONI GJITHASHTU:

• Gjendet i plagosur rëndë vrasësi i policit në Lezhë