Media shtetërore iraniane: Raportet për bisedime të reja në Pakistan nuk janë të vërteta

Agjencia shtetërore e lajmeve e Iranit, IRNA, ka hedhur poshtë raportimet se një raund i ri bisedimesh me Shtetet e Bashkuara të Amerikës do të zhvillohet në Pakistan, duke i cilësuar ato si “të pavërteta”.

Sipas IRNA-s, Uashingtoni ka bërë kërkesa “të tepërta”, ndërsa akuzohet se ndryshon shpesh qëndrimet dhe bie në kundërshtim me vetveten. Në reagimin e saj, agjencia thekson gjithashtu se politikat amerikane, përfshirë bllokadën ndaj porteve iraniane dhe “retorikën kërcënuese”, kanë penguar deri tani çdo përparim në negociata.

“Në këto rrethana, nuk ka perspektivë të ndritur për negociata të frytshme”, thuhet në një postim të shpërndarë në Telegram, pa cituar burime zyrtare apo emra institucionesh.

Kjo deklaratë vjen pas raportimeve nga disa media iraniane të lidhura me Trupat e Gardës Revolucionare Islamike, të cilat gjithashtu kanë shprehur dyshime mbi pjesëmarrjen e Iranit në bisedime.

Deri më tani, nuk ka një konfirmim zyrtar nëse përfaqësues iranianë do të marrin pjesë në çdo raund të mundshëm negociatash, ndërsa asnjë zyrtar i lartë nuk ka sqaruar publikisht qëndrimin e Teheranit.