Mediat turke: Muçi ndryshon fanellë, lë Besiktasin për rivalët në Superligën turke

Mediat turke raportojnë se e ardhmja e Ernest Muçit tashmë është e vendosur.

Sipas prestigjiozes “Hurriyet”, klubi i Besiktas ka arritur një marrëveshje për huazimin e futbollistit shqiptar te Trabzonspor për një periudhë njëvjeçare.

Aktualisht, lojtari dhe drejtuesit e Trabzonsporit po finalizojnë detajet e kontratës, me synimin që gjithçka të mbyllet para nisjes së kampionatit të ri.

24-vjeçari, i cili ishte pjesë e listës së Kombëtares për ndeshjet e shtatorit, humbi grumbullimin për shkak të një dëmtimi dhe u zëvendësua nga Kristian Shpendi.

Gazetari Nurgül Günaydın raporton se marrëveshja përfshin edhe një opsion blerjeje në fund të huazimit, ndërsa lojtari pritet të mbërrijë në qytetin e Trabzonit ditën e shtunë.

Muçi iu bashkua Besiktasit në vitin 2024, pas një transferimi nga Legia Varshavë për shumën e 10 milionë eurove.

Gjatë periudhës me bardhezinjtë, ai ka regjistruar 61 paraqitje, duke realizuar 11 gola dhe 4 asiste.

Kontrata e tij me Besiktaşin është e vlefshme deri në vitin 2027, por pas huazimit, ai do t’i bashkohet përkohësisht skuadrës së Detit të Zi.

Gjithashtu, Legia Varshavë do të përfitojë 10% të fitimit neto nga një shitje e mundshme në të ardhmen.

LEXONI GJITHASHTU:

• “Sylvinho është shqiptarizuar”, Artan Hoxha tregon pse nuk aktivizohet Ernest Muçi
• “Vlen 15 milionë €”, gazetari kritikon Sylvinhon: Si është e mundur që Muçi nuk luan