Merkel turne lamtumire në Ballkan, e nis nga Beogradi, më pas drejt Tiranës

Më 13 dhe 14 shtator kancelarja Angela Merkel do të zhvillojë një turne lamtumire në Ballkanin Perëndimor.

Sikundër bëhet me dije në njoftimin zyrtar të kancelarisë gjermane, më 14 shtator në Tiranë Merkel do të takojë krerët e qeverive të gjashtë vendeve të Ballkanit Perëndimor. Por më parë ajo do të qëndrojë në Beograd ku do të takohet me presidentin serb Aleksandër Vuçiç.

Takimi pritet të fokusohet në politikën dypalëshe, ekonomike dhe procesin e anëtarësimin në BE. Pas bisedës me presidentin serb është planifikuar një konferencë e përbashkët për mediat.

Në 14 shtator kancelarja Merkel do të udhëtojë drejt kryeqytetit shqiptar ku fillimisht do të takohet me kryeministrin Rama. Më pas ajo do të takohet me krerët e qeverive të gjashte vendeve të Ballkanit Perëndimor e cila do të përqendrohet kryesisht në çështjet e bashkëpunimit rajonal.

Në fund do të ketë edhe një konferencë për mediat. Përpara se të kthehet në Berlin, Kancelarja do të zhvillojë bisedime dypalëshe me kryeministrat e Kosovës, Bosnje-Hercegovinës, Malit të Zi dhe Maqedonisë së Veriut.