Merr fund kujdestaria e të atit, Britney Spears falënderon fansat

Këngëtarja Britney Spears ka falënderuar fansat që e kanë mbështetur që kujdestaria e të atit ndaj saj të merrte fund.

Ylli i popit bëri një postim ne Twitter, ku tha se jeta e saj tashmë ka marrë një drejtim tjetër.  Performanca e fundit e këngëtares ka qenë në vitin 2018.

Para disa ditësh një gjykatë në Amerikë i hoqi babait të këngëtares kujdestarinë ndaj saj.

Fansat e yllit të popit e festuan vendimin jashtë gjykatës. Britney nuk ishte e pranishme në seancë, por vetëm avokati i saj.

Prej 13 vitesh këngëtarja ishte nën kujdestari për shkak të problemeve psikologjike. Këngëtarja Spears është lutur publikisht që babait të saj t’i hiqet kujdestaria, duke deklaruar se ai kishte qenë abuziv dhe se i kontrollonte edhe detajet intime të jetës personale.

Një dokumentar i kohëve të fundit i the NeW York Times, pohoi gjithashtu se babai i Britney-t kishte punësuar një firmë sigurie që të përgjonte telefonin e të bijës.

Në seancën e së mërkurës, avokati i Britney-t tha se heqja e kujdestarisë atërore ishte hapi i parë drejt përfundimit të një “makthi”. Ai tha se këngëtarja “është abuzuar jo vetëm në dekadën e fundit, por që nga fëmijëria”.

Përveç çështjes së kujdestarisë, një llogaritar publik do të menaxhojë përkohësisht pasurinë prej 60 milion dollarësh të këngëtares. Një seancë dëgjimore do të mbahet më 12 nëntor për të diskutuar vendimin përfundimtar.