Merret vendimi, transporti publik rinis aktivitetin me 15 qershor, maskat të detyrueshme

Ministria e Infrastrukturës dhe Energjisë ka njoftuar pak minuta më parë se qeveria shqiptare ka marrë vendimin për të rihapur transportin publik në vend.

Me një shënim në faqen e saj zyrtare në “Facebook”, ministria thekson se, ky shërbim do të rifillojë aktivitetin me 15 qershor, sipas rregullave të diktuara nga Instituti i Shëndetit Publik.

Qytetarët që përdorin trnasportin publik duhet të pajisen me maska mbrojtëse, të rujanë distancën fizike, ndërsa autobusët nuk mund të përdorin më shumë se 70 % të kapaciteteve të tyre.

“Një lajm i mirë për qytetarët dhe sektorin e transportit publik.15 QERSHOR rifillon shërbimi i transport publik, duke ju përshtatur rregullave të reja, sipas protokollit të miratuar nga ISHP”,  thekson ministria. 

Ky sektor ka qenë një ndër më të goditurit nga pandemia globale e COVID-19. Përfaqësuesit e shoqatës së transportit i kanë kërkuar vazhdimisht qeverisë që të rinisnin aktivitetin, por vetë kryeministri Rama ka thënë se ky sektor përbën një risk të shtuar për përhapjen e pandemisë.

Gjithsesi, pas 15 qershorit, linjat e urbanëve dhe transporti publik do të rikthehen në punë, por me kapacitet të reduktuar.