Paqartësi te prindërit për mësimin plotësues

Me fletore dhe çanta në duar, këtë fillim muaji nxënësit kanë nisur mësimin plotësues.

Një pjesë e fëmijëve dhe prindërve ishin të paqartë sesi do zhvillohej përsëritja e njohurive, pasi nxënësit i kanë dorëzuar librat e vitit të kaluar.

“Fëmija sot ka filluar klasën e dytë, si vendim mund të them që është pak i paqartë. Situata e pandemisë e ka çorientuar pjesën e mësimdhënies tek fëmijët. Vetëm një fletore dhe një stilolaps kaq, të shohim çfarë do na thonë”, thotë një prind.

“Do zhvillohet përsëritje, edhe do marrim vetëm matematikën edhe gjuhen edhe do mësojmë. Nuk e dimë, nuk kemi informacion për këtë”, shprehet një nxënës.

Drejtoresha e Shkollës 9-vjeçare “Fan Noli” sqaron për Euronews Albania se përmes shënimeve, arsimi fillor do të zhvillojë dy orë mësimore, gjuhë shqipe dhe matematikë, ndërsa arsimi i mesëm i ulët, përveç tyre edhe gjuhën e huaj.

“Vështirësitë kuptohen janë të mëdha, ne jemi të ndërgjegjshëm, por në bashkëpunim me stafin mësimor, stafin drejtues, prindërit. Besojmë se do të arrijmë në rezultatet që pritet”, thotë drejtoresha e “Fan Nolit”.

Një pjesë e prindërve dhe nxënësve thonë se përsëritja e njohurive ishte e nevojshme, për shkak të mësimit online.

“Fëmija është në klasën e tretë dhe ka nevojë për përsëritje, sepse gjatë pushimeve nuk ka punuar mjaftueshëm”, shprehet një prej prindërve.

“Nuk kam pasur shumë mangësi, po edhe ka disa se mësimi online të gjitha. Nga data 1 deri më 24 do bëjmë me fletore dhe shënime”, thotë një nxënës.

Mësimi plotësues do zhvillohet deri më 24 shtator, pasi më 27 nis viti i ri shkollor.