Meta krah maturantëve, thirrje Ministrisë të dëgjojë kërkesat e tyre pa harruar vështirësitë e këtij viti shkollor

Presidenti Ilir Meta i bëri thirrje autoriteteve të arsimit që të marrin sa më parë në shqyrtim kërkesat e maturantëve dhe t’u përgjigjen “me transparencë të plotë në përmbushje të detyrimit ligjor që kanë”.

Përmes një postimi në Facebook mbrëmjen e së shtunës, Meta tha se po ndiqte me shqetësim protestat e maturantëve ditët e fundit dhe ishte krah tyre.

“Edhe zëri i vetëm i një maturanti duhet dëgjuar, vlerësuar dhe sqaruar për paqartësitë dhe vështirësitë që ka hasur në këtë kohë pandemie. Viti që kaloi ka qenë shumë i vështirë për të gjithë sistemin arsimor, por në mënyrë të veçantë për maturantët tanë,” – kujtoi Presidenti teksa këshilloi autoritetet që vlerësimi i provimeve të jetë i drejtë për kohët e vështira që kaluan maturantët.

Meta apelon që ekspertët të mos vlerësojnë provimet “si një ndëshkim ndaj pamundësisë objektive të studentëve dhe kufizimeve të pamerituara për arritjen e rezultateve të kërkuara”.

Lexoni gjithashtu:

Ministria e Arsimit adreson shqetësimet e maturantëve, apelon të përgatiten për provimin e radhës