Milan 15 ndeshje pa humbje, rekord për Ronaldon, City tregon muskujt me Chelsea

E diela e parë e vitit 2021 ka rezervuar dhe takimet e para për disa nga skuadrat më elitare në Europë, ku duhet thënë se nuk pati surpriza. Për të 15-ën ndeshje në kampionat, Milan nuk njeh humbje, teksa mundi në transfertë Beneventon.

Vendi i parë për kuqezinjtë që duhet të mendojnë për takimin e radhës, kundër kampionëve në fuqi. Kuqezinjtë duhet t’i bëjnë mirë llogaritë, pasi menjëherë pas tyre ndodhet Inter, që regjistroi suksesin e tetë radhazi në kampionat.

Juventus nuk gaboi në takimin e Udinesen. ‘Zonja e vjetër’ triumfoi me rezultatin 4-1 falë golave të Chiesa, Dybala dhe dopietës së Ronaldos. I veçantë dygolëshi portugezit, i cili tani numëron 758 gola me klubet dhe përfaqësuesen, duke lënë pas vetes brazilianin Pele.

Në Angli, Mançester City ka treguar muskujt ndaj Chelsea. Skuadra e Pep Guardiolës shënoi tri herë në pak minuta që në pjesën e parë, duke i lënë pak vend për llogari bluve të Londrës, që shënuan golin e nderit në limitet e takimit.

Skuadra e Lampard duket se vijon të vuajë problemet e fundvitit të shkuar, pasi në 6 takimet e fundit në Premier League ka marrë vetëm 1 fitore.