San Siro është kryeqendra e Italisë mbrëmjen e kësaj të marte ku rikthehet uefa Champions League pas një pause 3 mujore. Kuqezinjtë e Milanit ndeshen me Totenhemin në fazën me eleminim direkt. Kjo është përballja e tretë mes këtyre dy skuadrave në këtë kompeticion, ku në vitin 2011 ishin anglezët ata të cilët triumfuan në fazën e 1/8.

Të dyja skuadrat vijnë në një formë jo shumë të mirë edhe pse kuqezinjtë u kthyen tek fitorja në përballjen e fundit ndaj Torinos në kampionat. Në anën tjetër Totenhemi i Antonio Kontes pësoi një disfatë të rëndë ndaj Leisterit 4-1.

Stefano Pioli duhet të bëjë gati 11shen e tij më të mirë në mbrëmje, ku vijon të vuajë mungesën e 5 futbollistëve. E njëjta gjë dhe tek anglezët ku mungesat nisin që nga porta me Lori. Milani pritet t’ ia besojë sulmin dyshes Zhiru-Leao dhe pas tyre Diaz me një skemë 3-4-1-2. Londinezët gjithashtu renditen me 3 në mbrojtje, me skemën tipike 3-4-3, ku sulmi pritet t’i besohet bomberit Herri Kein, i mbështetur nga krahët nga dyshja Kulusevski-Son.