Milan pëson humbjen e parë pas tetë muajsh, mposhtet 3-0 në San Siro nga Lille

Milan pësoi humbjen e parë pas 24 ndeshjesh. Skuadra e Piolit u mposht 3-0 në San Siro nga Lile.

Pa diskutim që nderi i mbrëmjes për francezët ishte turku Jusuf Jazixhi, i cili bëri një paraqitje thjesht fantastike duke realizuar të tre golat e takimit.

Një humbje që djeg kjo për Milanin, nga mënyra si erdhi por që pritej të mos e kishin të lehtë pasi përpara ndeshjes tekniku Stefano Pioli u shpreh se do të bënte rrotacion për të lënë disa futbollistë pushim.

Ndryshimet e bëra u reflektuan edhe në fushën e lojës ku nuk u pa ai Milan që jemi mësuar të shohim.

Zëvendësimet e bëra në pjesën e dytë nuk ndryshuan asgjë, një tregues ky që skuadra mbase nuk e ka mundësinë që të luftojë edhe në kampionat edhe në Evropë.

Kjo ishte humbja e parë që prej muajit mars. Në atë kohë kuqezinjtë u mundën nga Genoa po në San Siro në shifrat 1-2.

Ndërkohë që edhe Roma arriti një fitore të rëndësishme përballë Cluj në shifrat 5-0. Tre pikësh me vlerë edhe për Napolin që mposhti 2-1 Rijekën.